Wine Story. Ժամանակն է, որ հայկական գինին պատմի իր պատմությունը
Քլայվ Փարսհաուսը հայտնի գինու քննադատ է, հեղինակավոր առցանց գինու Decanter ամսագրի հեղինակ և խմբագիր: Գինու մասին նրա հոդվածները խորը սուզվում են գինու մշակույթի և տեխնոլոգիայի մեջ և ուսումնասիրում են գինեգործությունը ձևավորող համաշխարհային միտումները: STYLE.News.am-ի հետ զրույցում Քլայվը խոսել է գինեգործության աշխարհում իր անցած ուղու, այսօր գինեգործության աշխարհին սպառնացող հիմնական սպառնալիքների և հայկական գինիների ներուժի մասին։
Ինչպե՞ս առաջին անգամ սկսեցիք գրել գինու մասին, և ի՞նչը բերեց ձեզ Decanter ամսագրում US խմբագրի դերին:
Սա լավ հարց է: Ես տեղափոխվեցի Վաշինգտոն՝ Արևմտյան ափ և սկսեցի ուսումնասիրել տեղական գինիները: Ես մեծացել եմ բանվոր դասակարգի ընտանիքում, որը հեռու է գինեգործական որևէ տարածաշրջանից, բայց Վաշինգտոն նահանգի, այնուհետև Օրեգոնի գինիներին ծանոթանալուց հետո ես ամբողջովին հիացա այդ թեմայով: Այն ժամանակ բլոգները նոր էին սկսում հայտնվել, սա մինչ սոցիալական ցանցերի ու սմարթֆոնների դարաշրջանն էր։ Ես բացեցի իմ սեփական բլոգը, որը նվիրված էր Միացյալ Նահանգների հյուսիսարևմտյան շրջանի գինիներին, և այն վարեցի մոտ վեց կամ յոթ տարի: Այնուհետև ես սկսեցի աշխատել հեծանվային և ճամփորդական ամսագրերում, գրելով գինու, գարեջրի և ոգելից խմիչքների մասին՝ զուգահեռ շրջելով հեծանիվով ամբողջ աշխարհով մեկ: 2022 թվականին, հեծանվային ծանր վթարից հետո, որի ժամանակ ես կոտրեցի կոնքս, մի քանի ամիս հայտնվեցի անվասայլակին գամված։ Հենց այդ ժամանակ էր, որ Decanter-ը դիմեց ինձ՝ առաջարկելով դառնալ իրենց ամերիկյան հրատարակության խմբագիրը։ Նրանք կարիք ունեն Արևմտյան ափի գինեգործության ոլորտում փորձ ունեցող և տարածքի իմացությամբ մարդու:
Դուք երկար տարիներ հետևում եք գինեգործության ոլորտում փոփոխություններին։ Ձեր կարծիքով, ո՞ր գործոններն են այսօր ձևավորում համաշխարհային գինու լանդշաֆտը:
Հիմնական գործոններից մեկը բնական գինիների նկատմամբ հետաքրքրության աշխուժացումն է։ Գինեգործության ավանդական մեթոդները կրկին տարածված են դառնում, և նույնիսկ նրանք, ովքեր նախկինում մերժում էին նման մոտեցումները, սկսում են օգտագործել բնական խմորիչներ խմորման համար: Սա գրավում է նոր սերունդ և նոր սպառողներ, ինչը դրականորեն է ազդում ամբողջ ոլորտի վրա։ Եթե նույնիսկ բնական գինիների սիրահար չեք, ապա չի կարելի հերքել դրանց դրական ազդեցությունը շուկայի վրա:
