Քաթարը կոչ է արել միջազգային հանրությանը ՄԱԳԱՏԷ-ի հսկողության տակ առնել Իսրայելի միջուկային օբյեկտները
Քաթարը շաբաթ օրը կոչ է արել միջազգային հանրությանը ջանքեր գործադրել Իսրայելի բոլոր միջուկային օբյեկտները Ատոմային էներգիայի միջազգային գործակալության վերահսկողության տակ դնելու համար, հաղորդում է Arab News-ը:
Քաթարի ԱԳՆ-ն նաև կոչ է արել Իսրայելին «իր բոլոր միջուկային օբյեկտները դնել ՄԱԳԱՏԷ-ի երաշխիքների ներքո» և միանալ Միջուկային զենքի չտարածման պայմանագրին (NPT):
Հայտարարությունը հաջորդել է Վիեննայում ՄԱԳԱՏԷ-ի ղեկավարների հանդիպմանը, որին մասնակցել է Վիեննայում Քաթարի դեսպան և ՄԱԿ-ում մշտական ներկայացուցիչ Ջասիմ Յակուբ Ալ-Համադին:
Հանդիպմանը քննարկվել են օկուպացված պաղեստինյան տարածքներում տիրող իրավիճակը և Իսրայելի միջուկային ներուժը։
Հանդիպման ընթացքում Ալ-Համադին նշել է, որ «այս բանաձևերից մի քանիսը պարունակում են ուղղակի կոչ Իսրայելին միանալ NPT-ին՝ որպես միջուկային զենք չունեցող պետություն»: Նա նաև նշել է, որ «մերձավորարևելյան բոլոր երկրները, բացառությամբ Իսրայելի, NPT-ի մասնակիցներ են և գործակալության հետ արդյունավետ երաշխիքային համաձայնագրեր ունեն»:
Նա նաև նշել է, որ Իսրայելը շարունակում է իր ագրեսիվ քաղաքականությունը, ինչպիսիք են Գազայի հատվածից պաղեստինցիներին բռնի տեղահանման կոչերը և Արևմտյան ափում ռազմական գործողությունների ակտիվացումը, ինչպես նաև «Գազա մարդասիրական օգնության առաքման խոչընդոտումը և UNRWA-ի գործողությունների շարունակվող սահմանափակումները»:
Քաթարը Գազայում հրադադարի շուրջ Իսրայելի և պաղեստինյան ՀԱՄԱՍ խմբավորման միջև բանակցությունների միջնորդն է։