«Ոսկե ծիրանի» բացմանը կարմիր գորգի փոխարեն կցուցադրվի ֆրանսիացի դիզայներների գորգը. Տյուրս
Տյուրսի խոսքով` գորգը ստեղծվել է ֆրանսիացի վարպետներ Ժան-Ֆրանսուա Դինքջյանի և Էլոիզ Շաֆայի (Normal Studio) կողմից։
Այս տարի ևս «Ոսկե ծիրան» կինոփառատոնի բացման ժամանակ ավանդական կարմիր գորգ չի լինի։ Դրա փոխարեն կցուցադրվի յուրօրինակ գորգ։ Այս մասին ասուլիսում հայտարարեց Հայաստանի ֆրանսիական ինստիտուտի գործադիր տնօրեն Դավիդ Տյուրսը։
Նշենք, որ «Ոսկե ծիրան» կինոփառատոնը 2024 թվականին հրաժարվեց բացման արարողության ավանդական կարմիր գորգից։ Փառատոնի համար AHA collective-ը թողարկել էր ժամանակակից «կարմիր գորգի» հավաքածու՝ արվեստագետ Դավիթ Քոչունցի հետ միասին։
«Նախորդ տարի ավանդական կարմիր գորգից հրաժարվելը և արվեստագետ Դավիթ Քոչունցի գորգին նախապատվություն տալը շատ հաջողված ծրագիր էր և մեզ որոշակի մտքեր տվեց այս տարվա հետ կապված։ Նշեմ, որ նախորդ տարի ցուցադրված Դավիթ Քոչունցի գորգերն այժմ Ֆրանսիայում են և մասնակցում են միջազգային ցուցահանդեսի»,–ասաց նա։
Տյուրսի խոսքով` գորգը ստեղծվել է ֆրանսիացի վարպետներ Ժան-Ֆրանսուա Դինքջյանի և Էլոիզ Շաֆայի (Normal Studio) կողմից։
Հայաստանի ֆրանսիական ինստիտուտի գործադիր տնօրենը վստահ է` «Ոսկե ծիրան» կինոփառատոնը նաև կարևոր միջոց է հայ և ֆրանսիացի կինոգործիչներին իրար հետ ծանոթացնելու և համատեղ ծրագրերը խթանելու համար։ Այս տարի փառատոնի ծրագրում շատ են հայ–ֆրանսիական համատեղ արտադրությունները, և դա նշված համագործակցության արդյունքներից մեկն է։