Փաշինյանն ու Ալիևը կմասնակցեն ՇՀԿ գագաթնաժողովին
Մի շարք երկրների ղեկավարներ հաստատել են, որ կմասնակցեն գագաթնաժողովին։ Նրանց թվում է նաև Վլադիմիր Պուտինը։
ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը հրավիրվել են Շանհայի համագործակցության կազմակերպության (ՇՀԿ) գագաթնաժողովին։ Այս մասին հայտնել է Չինաստանի արտաքին գործերի նախարարի օգնական Լյու Բինը։
Գագաթնաժողովը, որը կանցկացվի օգոստոսի 31-ից սեպտեմբերի 1-ը Չինաստանի Թիենծին քաղաքում, կհավաքի ավելի քան 20 երկրների առաջնորդների և 10 միջազգային կազմակերպությունների ղեկավարների:
«Չինաստանի նախագահ Սի Ծինփինը կհանդիպի արտասահմանյան երկրների և միջազգային կազմակերպությունների ղեկավարների հետ, որպեսզի ամփոփի ՇՀԿ-ի գործունեության արդյունքները, քննարկի կազմակերպության զարգացման և մասնակիցների միջև համագործակցության ամրապնդման ուղիները», — ասել է դիվանագետը։
Նրա խոսքով` բացի Փաշինյանից ու Ալիևից, իրենց մասնակցությունը հաստատել են նաև Ռուսաստանի նախագահ Վլադիմիր Պուտինը, Բելառուսի նախագահ Ալեքսանդր Լուկաշենկոն, Հնդկաստանի վարչապետ Նարենդրա Մոդին, Իրանի նախագահ Մասուդ Փեզեշքիանը, Ղազախստանի նախագահ Կասիմ-Ժոմարտ Տոկաևը, Ղրղզստանի նախագահ Սադիր Ժապարովը, Պակիստանի նախագահ Շահբազ Շարիֆը, Տաջիկստանի նախագահ Էմոմալի Ռահմոնը, Ուզբեկստանի նախագահ Շավքաթ Միրզիյոևը, Մոնղոլիայի նախագահ Ուխնաագիյն Խուրելսուխը, Կամբոջայի վարչապետ Հուն Մանեթը, Մալդիվների նախագահ Մոհամմեդ Մուիզուն, Նեպալի վարչապետ Շարմա Օլին, Թուրքիայի նախագահ Ռեջեփ Թայիփ Էրդողանը, Եգիպտոսի վարչապետ Մուստաֆա Մադբուլին, Թուրքմենստանի նախագահ Սերդար Բերդիմուհամեդովը, Ինդոնեզիայի նախագահ Պրաբովո Սուբիանտոն, Լաոսի նախագահ Թոնգլուն Սիսուլիտը, Մալայզիայի վարչապետ Անվար Իբրահիմը և Վիետնամի վարչապետ Ֆամ Մին Չինը:
Միջոցառմանը հրավիրված է նաև ՄԱԿ-ի գլխավոր քարտուղար Անտոնիո Գուտերեշը:
Հիշեցնենք` ՀՀ արտգործնախարարությունը հուլիսի 3-ին հայտարարեց, որ Հայաստանը ցանկանում է Շանհայի համագործակցության կազմակերպության (ՇՀԿ) դիտորդ երկրի կարգավիճակը փոխարինել անդամ երկրի կարգավիճակով։ Փորձագիտական հանրությունն այս հայտարարությանը հակադարձեց հիշեցմամբ, որ այդ միջազգային կազմակերպությանն անդամակցում են նաև ՀԱՊԿ անդամ որոշ երկրներ, որոնց ՀՀ վարչապետ Նիկոլ Փաշինյանը մեղադրում է ոչ վստահելի լինելու և ՀՀ սահմանամերձ շրջաններ ադրբեջանական ներխուժմանը համարժեք չարձագանքելու մեջ։ Մինչդեռ գաղտնիք չէ, որ ՇՀԿ–ն քաղաքական, տնտեսական կառույց լինելուց զատ, իր կանոնակարգում նաև անվտանգության բաղադրիչ ունի։
Փաշինյանը հուլիսի 16-ին հայտարարեց, որ Շանհայի համագործակցության կազմակերպությանն անդամակցելը տեղավորվում է ՀՀ բալանսավորման և բալանսավորված արտաքին քաղաքականության շրջանակում։
Շանհայի համագործակցության կազմակերպությունը հիմնադրվել է 2001 թվականի հունիսի 15-ին: Սկզբում կազմակերպությանն անդամակցում էր վեց երկիր՝ Ռուսաստանը, Ղազախստանը, Ղրղզստանը, Չինաստանը, Տաջիկստանը և Ուզբեկստանը, 2017 թվականին նրանց միացան Հնդկաստանն ու Պակիստանը, իսկ 2023 թվականին՝ Իրանը։
Հայաստանը դիտորդ է Շանհայի համագործակցության կազմակերպությունում։