Չհայհոյել, հանդուրժել, լինել բարեկիրթ․ ՔՊ-ն ինքն իր համար էթիկայի կանոնագիրք է ընդունել
Նիկոլ Փաշինյանը հայտնել է, որ այլևս հայհոյանքին հայհոյանքով, իսկ վիրավորանքին վիրավորանքով չեն պատասխանելու, բայց միևնույն ժամանակ կոչ է արել դա որպես թուլություն չընկալել։
«Քաղաքացիական պայմանագիր» կուսակցությունը ՔՊ վարչության որոշմամբ ընդունել է կուսակցության Էթիկայի կանոնագիրք։ Այս մասին «Ֆեյսբուքի» իր էջում հայտնել է ՀՀ վարչապետ Նիկոլ Փաշինյանը։
Ըստ Փաշինյանի՝ ՔՊ-ն` որպես կառավարող ուժ, պատասխանատվություն է զգում երկրում քաղաքական միջավայրի, մթնոլորտի, կուլտուրայի զարգացման գործում։
«Էթիկայի կանոնագրքում ստանդարտներ ենք սահմանում ինքներս մեզ համար` դրանով իսկ հայտարարելով ինքներս մեզ հայհոյախոսության, անձնական թիրախավորման, վիրավորանքի դաշտից դուրս դնելու, ինչպես նաև բարեվարքության լավագույն ստանդարտներին մեր նվիրվածության մասին։ Այնպես որ, երբ հայհոյանքին հայհոյանքով, վիրավորանքին վիրավորանքով չպատասխանենք, խնդրում ենք դա չընկալել որպես թուլություն կամ վախվորածություն, այլ նվիրվածություն մեր իսկ ընդունած Էթիկայի կանոնագրքին»,- գրել է Փաշինյանը։
Նրա խոսքով՝ հանրային քաղաքական կյանքը գնալով պետք է ավելի ու ավելի փաստահենք դառնա՝ հիմնված փոխադարձ հարգանքի, բարեկրթության, թափանցիկության ու հաշվետվողականության վրա։
Կանոնագրքում 11 կետ կա․ նշվում է, որ կուսակցության անդամները պարտավոր են գործել ազնիվ և թափանցիկ, բարեխիղճ կատարել իրենց պարտականությունները, ստորադասել անձնական շահը հանրային շահին, խուսափել հովանավորչությունից։
ՔՊ-ականները նաև պարտավոր են պահպանել հավասարության սկզբունքը՝ մերժելով ցանկացած տեսակի խտրականություն, հարգալից վերաբերմունք դրսևորել բոլոր անձանց նկատմամբ, այդ թվում` քաղաքական հակառակորդների հետ հարաբերություններում, մերժել ատելության խոսքը, ոտնձգությունը։ Նրանք նաև պետք է առօրյա կյանքում՝ ներառյալ սոցիալական մեդիաներում, ցուցաբերեն պարկեշտություն, համեստություն, զսպվածություն և հարգանք բոլորի հանդեպ, ինչպես նաև խթանեն հանդուրժողականությունը։
Կանոնագրքում կա նաև «օրենքի գերակայություն» վերնագրով մի կետ, որով նշվում է, որ ՔՊ-ականները պարտավոր են ՀՀ սահմանադրությամբ և գործող օրենսդրությամբ ղեկավարվել, ինչպես նաև մերժել կոռուպցիան, իշխանության չարաշահումն ու օրենքի ցանկացած խախտում։ Կուսակցականների կողմից հանցագործության կատարման դեպքում էլ ՔՊ-ն անմիջապես պետք է արձագանքի՝ համապատասխան նյութերը փոխանցելով իրավապահներին։
Եվ, իհարկե, կանոնագրքում տեղ է գտել նաև «կրթություն» բաժինը, որտեղ նշվում է, որ էթիկան նախևառաջ կրթական և քաղաքակրթական հասկացություն է։
Այսպիսով, կուսակցականները այս կանոնագիրքը կիրառելու համար պետք է ուշադրություն դարձնեն իրենց ինքնազարգացմանն ու մասնագիտական զարգացմանը։