Հայաստանի և Թուրքիայի միջև այս պահին բանակցություններ կան. Վարուժան Գեղամյան

«Իմ կանխատեսում-զգուշացումները հաստատվեցին։ Այսօր Թուրքիայի մերձիշխանական «Sabah» օրաթերթը, հղում անելով իշխանական աղբյուրներին, ըստ էության փաստում է, որ Հայաստանի և Թուրքիայի միջև այս պահին բանակցություններ կան»։ Այս մասին հայտնեց իր Telegram-ալիքում թուրքագետ Վարուժան Գեղամյանը։

«Ըստ թերթի՝ Թուրքիայի նախագահի խորհրդական Քալընը հայտնելով, որ Կովկասում նոր կարգ է հաստատվում, Ապրիլի 24-ին ընդառաջ հետևյալ ուղերձն է փոխանցել ԱՄՆ-ին. «Մենք ասում ենք՝ Հայաստանի հետ հարաբերությունները կարգավորենք: Ասում ենք. «եթե նրանք (հայերը) ճիշտ քայլ անեն, տեսեք մենք էլ անգամ դարպասները կբացենք»: Նման մի ժամանակահատվածում, եթե դուք ցեղասպանություն բառը կիրառեք, նշանակում է՝ Կովկասում ամբողջ գործընթացը սաբոտաժի եք ենթարկում»», — գրում է թուրքագետը, հղում անելով թերթին:

Որպես եզրակացություն ՝ թուրքագետը գրում է. «Ըստ էության, սա ևս մեկ անգամ հաստատում է նաև իմ կանխատեսումը, որ Թուրքիայի հետ հարաբերությունները հաստատելու նախապայմաններ կան («եթե նրանք (հայերը) ճիշտ քայլ անեն, տեսեք մենք էլ անգամ դարպասները կբացենք»)»։