Թուրքիան հրաժարվել է ապաարգելափակել «Мир» քարտերը
Ամերիկյան պատժամիջոցների խստացումից հետո ծագած բանկերի և վճարային քարտերի հետ կապված խնդիրները լուծելու համար Թուրքիայի հետ շուրջ մեկ տարի տևած բանակցություններն անարդյունք ավարտվեցին։
Անկարայում ՌԴ դեսպան Ալեքսեյ Էրխովը «РИА Новости»-ին տված հարցազրույցում հայտարարել է, որ ռուսական «Мир» վճարային համակարգի քարտերը Թուրքիայում դեռ չեն աշխատում։ Ինչպես երևում է դիվանագետի խոսքերից՝ Մոսկվայում այլևս հույս չունեն, որ քարտերը կվերսկսեն իրենց աշխատանքը։ «Ես խորհուրդ եմ տալիս, որ նրանք, ովքեր պատրաստվում են մեկնել Թուրքիա, նախօրոք լուծեն մատուցվող ծառայությունների դիմաց վճարման հարցը կամ իրենց հետ ունենան որոշակի քանակությամբ կանխիկ արժույթ»,- ասել է Երխովը։
Թուրքիայի հետ հաշվարկների խնդրի մասին իմացել են մեկ տարի առաջ՝ այն բանից հետո, երբ ԱՄՆ-ն խստացրեց պատժամիջոցների ռեժիմը՝ սպառնալով աշխարհի բանկերին ամբողջ աշխարհում դոլարային համակարգից անջատումով՝ Ռուսաստանի ռազմարդյունաբերական համալիրի հետ գործարքների համար: Մեկ ամիս անց՝ փետրվարին, «Мир» վճարային համակարգի օպերատորը՝ Ազգային վճարային քարտերի համակարգը, ավելացվեց «սև ցուցակներին», որից հետո այն երկրները, որոնք Կրեմլը անվանում է «բարեկամական», սկսեցին հրաժարվել դրա օգտագործումից:
Ռուսաստանի դիվանագետները դեռևս անցյալ տարվա փետրվարին սկսել են բանակցություններ Թուրքիայի հետ՝ խոստանալով «աշխատանք կատարել» և «պաշտպանել արտաքին տնտեսական գործունեության մասնակիցներին», սակայն դրանք արդյունք չեն տվել: Ընդհակառակը, խնդիրներն ավելի են սրվել. սեպտեմբերին գրեթե բոլոր թուրքական բանկերը որոշել են հրաժարվել Ռուսաստանի և Բելառուսի հետ կապված գործարքների սպասարկումից, հայտնել է ТАСС-ը՝ հղում կատարելով իրավիճակին ծանոթ աղբյուրի: Նրա խոսքով՝ ռուսական ընկերությունների համար վճարումները դադարեցրել են Թուրքիայի բոլոր այն վարկային կազմակերպությունները, որոնք ունեն օտարերկրյա մասնակցություն, իսկ այժմ նրանց են ցանկանում միանալ նաև պետական և մասնավոր բանկերը, որոնք չունեն օտարերկրյա գործընկերներ: