Խաչատուր Սուքիասյան. Փաշինյանի զայրույթն ու վրդովմունքը պատճառներ և հիմքեր ունի
Ես առաջին դեմքը չեմ և չեմ կարող գնահատական տալ, քանի որ ծանոթ չեմ փաստաթղթերին և չեմ կարող պարզել նրա զայրույթի ու վրդովմունքի պատճառները, բայց դրա համար կան պատճառներ և լուրջ հիմքեր։ Այս մասին մարտի 27-ին NEWS.am-ի թղթակցի հետ զրույցում ասաց իշխող «Քաղաքացիական պայմանագիր» խմբակցության պատգամավոր Խաչատուր Սուքիասյանը.
«Խոսքը Հայաստանի լինել-չլինելու մասին է, ես երբեք չեմ տեսել, որ Նիկոլ Փաշինյանը պարծենա, նա հանգիստ զբաղված է իր գործով, և միաժամանակ դժվար պահերին ոչ ոք չի գնացել ու հանդիպել նրա հետ (նկատի ունի ՀՀ երկրորդ և երրորդ նախագահներին — խմբ.) ու չի մատնանշել խնդիրները։
Մենք պետք է հարգենք նախագահի ինստիտուտը: Եվ եթե երկրի առաջին դեմքը վարչապետն է, մենք պետք է հարգենք այս ինստիտուտը։ Նա ասաց. «Եկեք խոսենք փաստերով»: Բայց ոչ ոք չի գալիս»,- ընդգծեց պատգամավորը:
Նա տեղեկացրեց, որ քաղաքական որոշում է կայացվել Հովիկ Աղազարյանին և Տարոն Մարգարյանին պատգամավորական անձեռնմխելիությունից զրկելու վերաբերյալ, և իշխող կուսակցության պատգամավորների մեծամասնությունը նույն դիրքորոշումն ունի։
«Գլխավոր դատախազը չէր եկել Ազգային ժողով՝ իրենց ձերբակալելու, այլ քրեական գործ հարուցելու թույլտվություն ստանալու, որպեսզի լսեն։ Սա ժողովրդավարական երկիր է»,- նշեց պատգամավորը։
Ինչ վերաբերում է Գյումրիի ընտրություններին, Սուքիասյանը կարծում է, որ քաղաքի բնակիչներին պետք է թույլ տալ ինքնուրույն որոշել, թե ով է լինելու իրենց առաջնորդը։
«Միջամտությունն ինձ համար անընդունելի է։ Այս մարդիկ 30 տարվա ընթացքում դժվար ժամանակներ են ապրել։ Ներկայիս կենտրոնական իշխանությունները մեծ ուշադրություն են դարձնում քաղաքին։ Գյումրիի մասին նախկինում ոչ ոք չէր խոսում, այն մոռացվում էր, բայց հետո Նիկոլ Փաշինյանը սկսեց այցելել քաղաքի թանգարաններ, ինչը զբոսաշրջային շարժում առաջացրեց, այնտեղ հանրահավաքներ արեց, երաժշտական փառատոներ կազմակերպեց»,- ասաց պատգամավորը։