Միացյալ Նահանգները փոխում է Ուկրաինայի հետ ընդերքի մասին գործարքի քննարկման կանոնները. Զելենսկի
Միացյալ Նահանգները փոխում է Ուկրաինայի հետ ընդերքի մասին գործարքի քննարկման կանոնները. Ուստի դեռ վաղ է դրա եզրակացության մասին խոսելը, ըստРБК-Украина-ի՝ մամուլի ասուլիսում հայտարարել է Ուկրաինայի նախագահ Վլադիմիր Զելենսկին։
Նա ընդգծել է, որ առայժմ մտադիր չէ մեկնել Վաշինգտոն և որ այդ հարցն օրակարգում չկա.
Միաժամանակ, ըստ Զելենսկու, Ուկրաինան Միացյալ Նահանգներից ակնկալում է ընդերքի գործարքի վերջնական տարբերակը։
«Ինձ թվում է՝ մենք արդեն պայմանավորվել ենք, որ կլինի շրջանակային համաձայնագիր, այնուհետև՝ ամբողջական: Հիմա, ինչպես հասկանում եմ, ուկրաինա-ամերիկյան թիմերն աշխատում են դրա վրա, քանի որ Ամերիկան այժմ փոխում է այս կանոնները և անմիջապես առաջարկում է ամբողջական համաձայնագիր, և ամբողջական համաձայնագիրը պահանջում է մանրամասն ուսումնասիրություն, քանի որ դրանք լուրջ համաձայնագրեր են, որոնք վավերացվում են խորհրդարանում»,- նշել է Զելենսկին։
Ուկրաինայի նախագահը պարզաբանել է, որ իրավաբանները ևս պետք է աշխատեն նման փաստաթղթի վրա։
Նրանք արդեն պայմանավորվել էին շրջանակային գործարքի շուրջ, սակայն այժմ «կանոնները փոխվում են»։
«Մենք պետք է այստեղ գործենք զուսպ, հանգիստ, նայենք համաձայնագրին, իրավաբանները կուսումնասիրեն այն: Կան համարժեք բաներ, մենք կաջակցենք, եթե հարցեր լինեն, կգտնենք պատասխաններ: Հետևաբար, վաղ է խոսել համաձայնագրի մասին, որի տարբերակը մի քանի անգամ փոխվել է:
Բայց ես չեմ ուզում, որ ԱՄՆ-ն ունենա այն զգացումը, թե Ուկրաինան ընդհանրապես դեմ է դրան։ Մենք դրական ազդակներ ենք ցույց տվել, և կողմ ենք Միացյալ Նահանգների հետ համագործակցությանը»,- ընդգծել է նա։
Ավելի վաղ Զելենսկին հայտարարել էր, որ Միացյալ Նահանգներն Ուկրաինային ընդերքի գործարքի նոր տարբերակ է առաջարկել։
Սա ամբողջական, ոչ թե շրջանակային համաձայնագիր է, որն ավելի վաղ քննարկել էին երկրները: