Արտակարգ դեպք Սև ծովում. ՌԴ–ից Վրաստան ուղևորվող լցանավը հարձակման է ենթարկվել
Նավը արևածաղկի ձեթ էր տեղափոխում Ռուսաստանից Վրաստան։
ԵՐԵՎԱՆ, 2 դեկտեմբերի — Sputnik. Սև ծովում հերթական լցանավն է հարձակման ենթարկվել. արևածաղկի ձեթով բեռնված Midvolga 2 նավը Ռուսաստանից ուղևորվում էր Վրաստան:
Միջադեպը տեղի է ունեցել Թուրքիայի ափերից 80 մղոն հեռու, դրա մասին հաղորդել է Թուրքիայի երկրի տրանսպորտի նախարարությունը:
Այս պահին նավի անձնակազմի 13 անդամները առողջական խնդիրներ չունեն, նավը օգնություն չի խնդրում:
Գերատեսչությունում հավելել են, որ աշխատող շարժիչներով լցանավն ընթանում է Սինոպի ուղղությամբ։ Նախարարությունը չի հստակեցրել հարձակման բնույթը։
Հիշեցնենք` նոյեմբերի 28–ին Գամբիայի դրոշի տակ ընթացող Kairos լցանավն այրվել էր Սև ծովում՝ Թուրքիայի ափերից 28 մղոն հեռու։ Անձնակազմի 25 անդամները հաջողությամբ տարհանվել էին։ Ավելի ուշ Virat լցանավի անձնակազմը հայտնել էր, որ Թուրքիայի ափերից 35 մղոն հեռու նավը հարվածի է ենթարկվել: Տախտակամածին անձնակազմի 20 անդամ է եղել, որոնք հայտարարել են, որ չեն լքի նավը։ Նոյեմբերի 29–ին լցանավը նոր հարձակման է ենթարկվել առանց անձնակազմի ծովային մոտորանավերի կողմից։