Թուրքիայում շարունակվում են Իմամօղլուի կալանավորման դեմ բողոքի ցույցերը. ոստիկանությունը հատուկ միջոցներ է կիրառել
Անկարայում, Ստամբուլում, Իզմիրում և այլ քաղաքներում շարունակվում են Ստամբուլի պաշտոնանկ արված քաղաքապետ Էքրեմ Իմամօղլուի ձերբակալման և դրան հաջորդած կալանավորման դեմ բողոքի ցույցերը։
BBC News-ի հաղորդմամբ, Անկարայում ոստիկանությունն արցունքաբեր գազ է կիրառել ցուցարարների դեմ։
Միաժամանակ երկրում բողոքի ակցիաների ժամանակ նաև բախումներ են եղել ցուցարարների և ոստիկանների միջև, իրավապահ մարմիններն անգամ կրակել են ռետինե գնդակներով և ջրցան մեքենաներ են կիրառել։
Ավելի վաղ Թուրքիայի դատարանը կոռուպցիայի մեղադրանքով կալանավորել էր Ստամբուլի քաղաքապետ Էքրեմ Իմամօղլուին։ Նա հեռացվել է զբաղեցրած պաշտոնից։ Իմամօղլուն համարվում է Թուրքիայի ներկայիս նախագահ Ռեջեփ Թայիփ Էրդողանի գլխավոր մրցակիցը 2028 թվականին կայանալիք ընտրություններում։
Ավելի ուշ Իմամօղլուն սոցցանցում գրառում է կատարել՝ կոչ անելով թուրքերին պայքարել և մասնակցել ընտրություններին։